Animaladas

Chamábanlle raposa

querendo dicir enganosa,

e a realidade

é que era fantasiosa.

Chamábanlle loba

porque seica se impoñía,

e a realidade

é que tan só se defendía.

Chamábanlle porca,

seica non era honesta,

e a realidade

é que era moi tenra.

Chamábanlle lagarta,

disque era maliciosa,

e a realidade

é que era bondadosa.

Chamábanlle cadela,

porque seica tiña mal xenio,

e a realidade

é que tiña moito enxeño.

Chamábanlle bicha,

disque tiña mal carácter,

e a realidade

é que tiña moita arte.

Chamábanlle cabra,

querendo dicir que era tola,

e a realidade

é que non había persoa máis corda.