Recordo o teu zapato mollado no medio da noite.
Recordo o xogo das agochadas en familia.
Recordo os contos ao lado da lareira.
Recordo os reis nos que me mercaches aquela preciosa boneca.
Recordo cando me ensinaches a táboa de multiplicar.
Recordo cando facías de perruqueiro da veciñanza.
Recordo cando nos desacordos acudían a ti, coma se a túa palabra fose a xusta. Que o era.
Recordo a túa firmeza en tódolos campos da vida.
Recordo o teu atrevemento con algún vehículo.
Recordo que sempre me gañabas ás cartas.
Recordo o teu respecto por tod@s e o que tod@s che tiñan a ti.
Recordo a primeira vez que te vin bicala nos beizos.
Recordo cando ela me contou como vos coñecestes.
Recordo cando vos dabades a man por debaixo da mesa.
Recordo as vosas sestas á par detrás da cociña de leña.
Recordo os teus preciosos ollos verdes.
Recordos imborrables.
Recordo cando xa non me recordabas.
Pegadas na verea 